Siempre la viste mio Çid el Campeador.
Una cofia sobre los pelos d'un escarin de pro,
3095 Con oro es obrada, fecha por razon
Que no le contalasen los pelos al buen Çid Campeador.
La barba habie luenga y prisola con el cordon,
Por tal lo faze esto, que recaudar quiere todo lo suyo.
Desuso cubrio un manto que es de gran valor,
3100 En el habrien que ver quantos que hy son.
Con aquestos çiento que adobar mando
Apriessa cabalga, de San Servan salio;
Asi iba mio Çid adobado al la corte.
A la puerta de fuera descabalga a sabor,
3105 Cuerdamiente entra mio Çid con todos los suyos,
El va en medio y los çiento aderredor.
Quando lo vieron entrar al que en buen hora naçio,
Levantose en pie el buen rey don Alfonso
Y el conde don Anriche y el conde don Remon
3110 Y desi adelante, sabed, todos los otros.
A gran hondra lo reçiben al que en buen hora naçio.
No se quiso levantar el crespo de Grañon
Ni todos los del bando de ifantes de Carrion.
El Rey dixo al Çid:
[REY]
Venid aca ser, Campeador,
3115 En aqueste escaño que me diestes vos en don,
Maguer que algunos pesa, mejor sodes que nos.
[CRONISTA]
Eshora dixo muchas merçedes el que Valençia gano.
[CID]
Sed en vuestro escaño como rey y señor,
Aca posare con todos aquestos mios.
[CRONISTA]
3120 Lo que dixo el Çid al Rey plogo de coraçon.
En un escaño torniño esora mio Çid poso,
Los çiento que le aguardan posan aderredor.
Catando estan a mio Çid quantos ha en la corte,
A la barba que habia luenga y presa con el cordon;
3125 En sus aguisamientos bien semeja varon.
No le pueden catar de vergüença ifantes de Carrion.
Esora se llevo en pie el buen rey don Alfonso.
[REY]
Oid, mesnadas, ¡si vos vala el Criador!
Yo, de que fu rey, no fize mas de dos cortes,


97

97