Espuelas tienen calçadas los malos traidores,
En mano prenden las çinchas fuertes y duradores.
Quando esto vieron las dueñas, fablaba doña Sol.
[SOL]
2725 ¡Por Dios vos rogamos, don Diego y don Fernando!
Dos espadas tenedes fuertes y tajadores,
A la una dizen Colada y al otra Tizon;
Cortadnos las cabeças, martires seremos nos,
Moros y cristianos departiran d'esta razon,
2730 Que por lo que nos mereçemos no lo prendemos nos;
Atan malos ensiemplos no fagades sobre nos;
Si nos fueremos majadas, abiltaredes a vos,
Retraer vos lo han en vistas o en cortes.
[CRONISTA]
Lo que ruegan las dueñas no les ha ningun pro.
2735 Esora les compieçan a dar los ifantes de Carrion,
Con las çinchas corredizas majanlas tan sin sabor,
Con las espuelas agudas, donde ellas han mal sabor;
Rompien las camisas y las carnes a ellas amas a dos.
Limpia salie la sangre sobre los çiclatones,
2740 Ya lo sienten ellas en los sus coraçones,
¡Qual ventura serie esta, si ploguiese al Criador
Que asomase esora el Çid Campeador!
Tanto las majaron que sin cosimente son,
Sangrientas en las camisas y todos los çiclatones.
2745 Cansados son de ferir ellos amos a dos,
Ensayandose amos qual dara los mejores colpes.
Ya no pueden fablar doña Elvira y doña Sol,
Por muertas las dexaron en el robredro de Corpes.
Llevaronles los mantos y las pieles armiñas, 129
2750 Mas dexanlas marridas en briales y en camisas
Y a las aves del monte y a las bestias de la fiera guisa;
Por muertas las dexaron, sabed, que no por vivas.
¡Qual ventura serie, si asomase esora el Çid Campeador!
Los ifantes de Carrion en el robredo de Corpes
2755 Por muertas las dexaron,
Que la una al otra no le torna recaudo;
Por los montes do iban ellos, ibanse alabando. 130
[DIEGO]
De nuestros casamientos agora somos vengados.
[FERNANDO]
No las debiemos tomar por barraganas,
2760 --¡Si no fuesemos rogados!--


87

87