La cara fronzida y almofar soltado,
Cofia sobre los pelos, fronzida d'ella yaquanto.
Algo veia mio Çid de lo que era pagado,
Alço sus ojos, estaba adelante catando,
2440 Y vio venir a Diego y a Fernando,
Amos son fijos del conde don Gonçalo.
Alegrose mio Çid, fermoso sonrisando.
[CID]
¡Venides, mios yernos, mios fijos sodes amos!
Se que de lidiar bien sodes pagados,
2445 A Carrion de vos iran buenos mandados,
Como al rey Bucar habemos arrancado.
Como yo fio por Dios y en todos los sus santos,
D'esta arrancada nos iremos pagados.
[CRONISTA]
Minaya Alvar Fañez esora es llegado,
2450 El escudo trae al cuello y todo espado,
de los colpes de las lanças no habia recaudo;
Aquellos que se los dieran no se lo habian logrado.
Por el codo ayuso la sangre destellando,
De veinte arriba ha moros matado;
2455 De todas partes sus vasallos van llegando.
[MINAYA]
Grado a Dios y al Padre que esta en alto
Y a vos Çid, que en buen hora fuestes nado;
Matastes a Bucar y arrancamos el campo,
Todos estos bienes de vos son y de vuestros vasallos,
2460 Y vuestros yernos aqui son ensayados,
Fartos de lidiar con moros en el campo.
[CRONISTA]
Dixo mio Çid:
[CID ]
Yo d'esto so pagado;
Quando agora son buenos, adelante seran preçiados.
[CRONISTA]
Por bien lo dixo el Çid, mas ellos lo tovieron a mal.
2465 Todas las ganançias a Valençia son llegadas,
Alegre es mio Çid con todas sus compañas,
Que a la raçion cae seis çientos marcos de plata.
Los yernos de mio Çid, quando este haber tomaron
D'esta arrancada, que lo tenien en su salvo,
2470 Cuidaron que en sus dias nunca serien menguados.
Fueron en Valençia muy bien arreados,


79

79