Esto fare yo de grado.
[CRONISTA]
Levantanse derechas y metioselas en mano,
A los ifantes de Carrion Minaya va fablando.
[MINAYA]
2230 Afevos delante Minaya, amos sodes hermanos;
Por mano del rey Alfonso, que a mi lo hobo mandado,
Dovos estas dueñas, amas son fijas d'algo,
Que las tomasedes por mugieres a honra y a recaudo.
[CRONISTA]
Amos las reçiben de amor y de grado;
2235 A mio Çid y a su mugier van besar la mano.
Quando hobieron aquesto fecho, salieron del palaçio,
Para Santa Maria apriessa adeliñando.
El obispo don Jeronimo vistiose tan privado,
A la puerta de la eglesia seialos esperando,
2240 Dioles bendiçiones, la missa ha cantado.
Al salir de la eglesia cabalgaron tan privado,
A la glera de Valençia fuera dieron salto.
¡Dios, que bien tovieron armas el Çid y sus vasallos!
Tres caballos cameo el que en buen hora nasco,
2245 Mio Çid de lo que veie mucho era pagado,
Los ifantes de Carrion bien han cabalgado.
Tornanse con las dueñas, a Valençia han entrado,
Ricas fueron las bodas en el alcaçar honrado
Y al otro dia fizo mio Çid fincar siete tablados;
2250 Antes que entrasen a yantar todos los quebrantaron.
Quince dias cumplidos duraron en las bodas,
Ya çerca de los quinze dias ya se van los fijos d'algo.
Mio Çid don Rodrigo, el que en buen hora nasco,
Entre palafres y mulas y corredores caballos,
2255 En bestias sines al, çiento son mandados,
Mantos y pelliçones y otros vestidos largos;
No fueron en cuenta los haberes monedados.
Los vasallos de mio Çid, asi son acordados,
Cada uno por si sus dones habien dados;
2260 Qui haber quiere prender bien era abastado.
Ricos tornan a Castiella los que a las bodas llegaron,
Ya se iban partiendo aquestos hospedados,
Espidiendose de Ruy Diaz, el que en buen hora nasco
Y a todas las dueñas y a los fijos d'algo;
2265 Por pagados se parten de mio Çid y de sus vasallos.
Gran bien dizen d'ellos, ca sera aguisado.


73

73