Pasando van las sierras y los montes y las aguas, 98
Llegan a Valladolid, do el Rey Alfonso estaba.
Enviabanle mandado Pero Vermuez y Minaya,
Que mandase reçibir a esta compaña,
1830 Mio Çid el de Valencia envia su presentaja.
Alegre fue el Rey, no viestes atanto,
Mando cabalgar apriessa todos sus fijos d'algo, 99
Y en los primeros el Rey fuera dio salto
A ver estos mensajes del que en buen hora nasco.
1835 Los Ifantes de Carrion, sabed, hy se açertaron,
El conde don Garçia, su enemigo malo;
A los unos plaze y a los otros va pesando.
A ojo lo habien los del que en buen hora nasco.
Cuedanse que es almofalla, ca no vienen con mandado.
1840 El Rey don Alfonso seise santiguando,
Minaya y Pero Vermuez adelante son llegados,
Firieronse a tierra, desçendieron de los caballos,
Ante el Rey Alfonso los hinojos fincados,
Besan la tierra y los pies amos.
[MINAYA]
1845 ¡Merçed, Rey Alfonso, sodes tan honrado!
Por mio Çid el Campeador todo esto vos besamos,
a vos llama señor y tienese por vuestro vasallo,
Mucho preçia la hondra el Çid que le habedes dado.
[VERMUDEZ]
Pocos dias ha, Rey, que una lid ha arrancado
1850 A aquel Rey de Marruecos, Yu,cef por nombrado,
Con çinquaenta mill arrancolos del campo.
[MINAYA]
Las ganançias que fizo mucho son sobejanas,
Ricos son venidos todos los sus vasallos,
Y enviavos dozientos caballos y besavos las manos.
[CRONISTA]
1855 Dixo el Rey don Alfonso:
[REY ]
Reçibolos de grado.
Gradescolo a mio Çid que tal don me ha enviado,
Aun vea hora que de mi sea pagado.
[CRONISTA]
Esto plogo a muchos y besaronle las manos.
Peso al conde don Garçia y mal era airado,
1860 Con diez de sus parientes aparte daban salto.
[DON GARCIA]


61

61