Dos Reyes de moros mataron en ese alcançe,
Fasta Valençia duro el segudar.
Grandes son las ganançias que mio Çid fechas ha,
1150 Prisieron Çebolla y quanto que es hy adelante,
De pies de caballo los que se pudieron escapar.
Robaban el campo y piensanse de tornar,
Entraban a Murviedro con estas ganançias que traen grandes.
Las nuevas de mio Çid, sabed, sonando van,
1155 Miedo han en Valencia que no saben que se far
Sonando van sus nuevas allende parte del mar;
Alegre era el Çid y todas sus compañas, 69
Que Dios le ayudara y fiziera esta arrancada.
Daban sus corredores y fazian las trasnochadas,
1160 Llegan a Guiera y llegan a Xativa,
Aun mas ayuso a Deina la casa;
Cabo del mar tierra de moros firme la quebranta,
Ganaron Peña Cadiella, las exidas y las entradas,
Quando el Çid Campeador hobo Peña Cadiella 70
1165 Mal les pesa en Xativa y dentro en Gujera,
No es con recaudo el dolor de Valençia.
En tierra de moros prendiendo y ganando
Y durmiendo los dias y las noches trasnochando, 71
En ganar aquellas villas mio Çid duro tres años.
1170 A los de Valençia escarmentados los han, 72
No osan fuera se exir ni con el se ajuntar,
Tajabales las huertas y faziales gran mal,
En cada uno d'estos años mio Çid les tollo el pan.
Mal se aquexan los de Valençia que no saben que se far,
1175 De ninguna parte que sea no les vinia pan,
ni da consejo padre a fijo, ni fijo a padre,
ni amigo a migo no se pueden consolar;
Mala cueta es, señores, haber mingua de pan,
Fijos y mugieres verlos morir de fambre.
1180 Delante veien su duelo, no se pueden uyar,
Por el Rey de Marruecos hobieron a enviar;
Con el de los Montes Claros habian guerra tan grande,
No les dixo consejo, ni los vino uyar.
Sopolo mio Çid, de coraçon le plaze,
1185 Salio de Murviedro una noche en trasnochada,
Amaneçio a mio Çid en tierras de Mont Real,
Por Aragon y por Navarra pregon mando echar,
A tierras de Castiella envio sus mensajes:
Quien quiere perder cueta y venir a rictad


42

42