[CONDE]
Folguedes, ya mio Çid, sodes en vuestro salvo;
1075 Pagado vos he por todo aqueste año,
De venir vos buscar solo no sera pensado.
[CRONISTA]
Aguijaba el conde y pensaba de andar, 63
Tornando va la cabeça y catandose atras;
Miedo iba habiendo que mio Çid se repintra,
1080 Lo que no ferie el caboso por quanto en el mundo ha,
¡Una deslealtança ca no la fizo alguandre!
Ido es el conde, tornose el de Bivar,
Juntose con sus mesnadas, compeçolas de llegar
De la ganançia que han fecha maravillosa y grande,
[CID]
1085 ¡Aqui se compieça la gesta de mio Çid el de Bivar! 64
[CRONISTA]
Tan ricos son los suyos que no saben que se han.
Poblado ha mio Çid el puerto de Alucad,
Dexado ha Saragoça y a las tierras duca
Y dexado ha Huesca y las tierras de Mont Alvan,
1090 Contra la mar salada compeço de guerrear,
A oriente exe el sol y tornose a esa parte.
Mio Çid gano a Xerica y a Onda y Almenar,
Tierras de Borriana todas conquistas las ha.
Ayudole el Criador, el señor que es en çielo; 65
1095 El con todo esto priso a Murviedro,
Ya veie mio Cid que Dios le iba valiendo.
Dentro en Valençia no es poco el miedo.
Pesa a los de Valençia sabed, no les plaze,
Prisieron su consejo que le viniesen çercar; 66
1100 Trasnocharon de noche, al alba de la man
Açerca de Murviedro tornan tiendas a fincar.
Violo mio Çid, tomose a maravillar.
[CID]
¡Grado a Ti, Padre espirital!
En sus tierras somos y femoles todo mal,
Bebemos su vino y comemos el su pan,
1105 Si nos çercar vienen, con derecho lo fazen.
A menos de lid no se partira aquesto;
Vayan los mandados por los que nos deben ayudar,
Los unos a Xerica y los otros a Alucad,
Desi a Onda y los otros a Almenar,
1110 Los de Borriana luego vengan aca.


40

40