1040 A vos y a otros dos dar vos he de mano.
Mas quanto habedes perdido y yo gane en campo,
Sabed, no vos dare a vos un dinero malo.
Mas quanto habedes perdido no vos lo dare,
Ca huebos me lo he y para estos mios vasallos
1045 Que conmigo andan lazrados, y no vos lo dare.
Prendiendo de vos y de otros ir nos hemos pagando,
Habremos esta vida mientras ploguiere al Padre santo,
Como que ira ha de Rey y de tierra es echado.
[CRONISTA]
Alegre es el conde y pidio agua a las manos
1050 Y tienenselo delante y dieronselo privado.
Con los caballeros que el Çid le habia dados
Comiendo va el conde, ¡Dios, que de buen grado!
Sobre el seia el que en buen hora nasco.
[CID]
Si bien no comedes, conde, donde yo sea pagado,
1055 Aqui feremos la morada, no nos partiremos amos.
[CRONISTA]
Aqui dixo el conde:
[CONDE]
¡De voluntad y de grado!
[CRONISTA]
Con estos dos caballeros apriesa va yantando;
Pagado es mio Çid, que lo esta aguardando,
Porque el conde don Remon tan bien volvie las manos.
[CONDE]
1060 Si vos ploguiere, mio Çid, de ir somos guisados,
Mandad nos dar las bestias y cabalgaremos privado;
Del dia que fu conde no yante tan de buen grado,
El sabor que dende he no sera olvidado.
[CRONISTA]
Danle tres palafres muy bien ensellados
1065 Y buenas vestiduras de pelliçones y de mantos.
El conde don Remon entre los dos es entrado,
Fasta cabo del albergada escurriolos el castellano.
[CID]
Ya vos ides, conde, a guisa de muy franco,
En grado vos lo tengo lo que me habedes dexado.
1070 Si vos viniere emiente que quisieredes vengarlo,
Si me vinieredes buscar, fallarme podredes;
Y si no, mandedes buscar do me dexaredes
De lo vuestro, do de lo mio llevaredes algo.


39

39