655 Al bueno de mio Çid en Alcoçer le van çercar;
Fincaron las tiendas y prenden las posadas, 33
Creçen estos virtos, ca gentes son sobejanas.
Las arobdas, que los moros sacan de dia
Y de noche envueltos andan en armas;
660 Muchas son las arobdas y grande es el almofalla.
A los de mio Çid ya les tuellen el agua;
Mesnadas de mio Çid exir querien a la batalla,
El que en buen hora nasco firme se lo vedaba;
Tovieronsela en çerca cumplidas tres semanas.
665 A cabo de tres semanas, la quarta queria entrar, 34
Mio Çid con los suyos tornose a acordar.
[CID]
El agua nos han vedada, exir nos ha el pan;
Que nos queramos ir de noche no nos lo consintran;
Grandes son los poderes por con ellos lidiar.
670 Dezidme, caballeros, como vos plaze de far.
[CRONISTA]
Primero fablo Minaya, un caballero de prestar.
[MINAYA]
De Castiella la gentil exidos somos aca,
Si con moros no lidiaremos, no nos daran del pan;
Bien somos nos seisçientos, algunos hay de mas.
675 ¡En el nombre del Criador, que no pase por al!
¡Vayamos los ferir en aquel dia de cras!
[CRONISTA]
Dixo el Campeador:
[CID]
A mi guisa fablastes
Hondrastesvos Minaya, ca habervos lo iedes de far.
[CRONISTA]
Todos los moros y las moras de fuera los manda echar,
680 Que no sopiese ninguno esta su poridad.
El dia y la noche piensanse de adobar;
Otro dia mañana el sol queria apuntar,
Armado es mio Çid con quantos que el ha;
Fablaba mio Çid como odredes contar.
[CID]
685 Todos iscamos fuera que nadi no raste,
Sino dos peones solos por la puerta guardar;
Si nos murieremos en campo, en castiello nos entraran,
Si vençieremos la batalla, creçeremos en rictad;
Y vos. Pero Vermuez, la mi seña tomad,


28

28