En este castiello grande haber habemos preso,
Los moros yazen muertos, de vivos pocos veo.
Los moros y las moras vender no los podremos,
620 Que los descabeçemos nada no ganaremos,
Cojamoslos de dentro, ca el señorio tenemos,
Posaremos en sus casas y d'ellos nos serviremos.
[CRONISTA]
Mio Çid con esta ganançia en Alcoçer esta, 32
Fizo enviar por la tienda que dexara alla.
625 Mucho pesa a los de Teca y a los de Terrer no plaze,
Y a los de Calatayud no plaze;
Al Rey de Valençia enviaron con mensaje:
[MENSAJERO]
Que a uno que dizien mio Çid Ruy Diaz de Bivar
Airolo el Rey Alfonso, de tierra echado lo ha;
630 Vino posar sobre Alcoçer, en un tan fuerte logar,
Sacolos a çelada, el castiello ganado ha.
Si no das consejo, a Teca y a Terrer perderas,
Perderas Calatayuth, que no puede escapar,
Ribera de Salon toda ira a mal,
635 Asi fera lo de Siloca, que es del otra parte.
[CRONISTA]
Cuando lo oyo el rey Tamin, por cuer le peso mal.
[TAMIN]
Tres reyes veo de moros, derredor de mi estar,
No lo detardedes los dos id pora alla;
tres mill moros llevedes con armas de lidiar,
640 Con los de la frontera que vos ayudaran.
Prendedmelo a vida, aduzidmelo delante,
Porque seme entro en mi tierra derecho me habra a dar.
[CRONISTA]
Tres mill moros cabalgan y piensan de andar,
Ellos vinieron a la noche en Sogorbe posar;
645 Otro dia mañana piensan de cabalgar,
Vinieron a la noche a Çelfa posar.
Por los de la frontera piensan de enviar;
No lo detienen, vienen de todas partes.
Ixieron de Çelfa, la que dizen de Canal,
650 Andidieron todo el dia, que vagar no se dan,
Vinieron esa noche en Calatayuth posar.
Por todas esas tierras los pregones dan.
Gentes se ajuntaron sobejanas de grandes
Con aquestos dos reyes que dizen Fariz y Galve.


27

27