¡Merced, ya Çid, barba tan cumplida!
Feme ante vos, yo y vuestras fijas, infantes son e de dias chicas, 16
270 Con aquestas mis dueñas de quien soy yo servida;
Yo lo veo que estades vos en ida
Y nos de vos partir nos hemos en vida.
¡Dadnos consejo por amor de Santa Maria!
[CRONISTA]
Enclino las manos en la su barba bellida,
275 A las sus fijas en brazo las prendia,
Llegolas al coraçon, ca mucho las queria.
Llora de los ojos, tan fuerte mientre sospira.
[CID]
Ya doña Ximena, la mi mugier tan cumplida,
Como a la mi alma yo tanto vos queria;
280 Ya lo vedes que partirnos hemos en vida,
Yo ire y vos fincaredes remanida.
¡Plega a Dios y a Santa Maria que aun con mis manos case estas
mis fijas,
Do quede ventura y algunos dias vida,
Y vos, mugier honrada, de mi seades servida!
[CRONISTA]
285 Gran yantar le fazen al buen Campeador. 17
Tañen las campanas en San Pero a clamor,
Por Castiella oyendo van los pregones:
Como se va de tierra mio Çid el Campeador.
Unos dexan casas y otros honores;
290 En aquese dia a la puente de Arlançon
çiento quinze caballeros todos juntados son,
Todos demandan por mio Çid el Campeador,
Martin Antolinez con ellos se cogio,
Vanse para San Pero, do esta el que en buen punto naçio;
295 Quando lo sopo mio Çid el de Bivar, 18
que le creçe compaña, por que mas valdra,
Apriessa cabalga, reçibir los salie;
Tornose a sonrisar, lleganle todos, la mano le van besar.
Fablo mio Çid de toda voluntad.
[CID]
300 Yo ruego a Dios y al Padre espirital:
Vos, que por mi dexades casas y heredades,
Enantes que yo muera, algun bien vos pueda far,
Lo que perdedes doblado vos lo cobrar.
[CRONISTA]
Plogo a mio Çid, porque creçio en la yantar;


18

18