[CID]
¡Merçed, ay rey señor, por amor de caridad!
La rencura mayor no se me puede olvidar.
3255 Oidme toda la corte y pesevos de mio mal,
de los ifantes de Carrion, que me deshondraron tan mal;
A menos de riebtos no los puedo dexar.
Dezid, ¿que vos mereçi, ifantes en juego o en vero? 139
¿O en alguna razon? Aqui lo mejorare a juizio de la corte.
3260 ¿A que me descubriestes las telas del coraçon?
A la salida de Valençia mis fijas vos di yo,
Con muy gran hondra y haberes a nombre.
Quando las no queriedes, ya canes traidores,
¿Por que las sacabades de Valençia sus honores?
3265 ¿A que las firiestes a çinchas y a espolones?
Solas las dexastes en el robredo de Corpes,
A las bestias fieras y a las aves del monte;
Por quanto les fiziestes menos valedes vos.
Si no recudedes, vealo esta corte.
[CRONISTA]
3270 El conde don Garçia en pie se levantaba. 140
[DON GARCIA]
¡Merçed, ya rey, el mejor de toda España!
Vezose mio Çid a las cortes pregonadas;
Dexola creçer y luenga trae la barba,
Los unos le han miedo y los otros espanta.
3275 Los de Carrion son de natura tal,
No se las debien querer sus fijas por barraganas.
¡Oh quien se las diera por parejas o por veladas!
Derecho fizieron por que las han dexadas,
Quanto el dize no se lo preçiamos nada.
[CRONISTA]
3280 Esora el Campeador prisose a la barba.
[CID]
Grado a Dios, que çielo y tierra manda,
Por eso es luenga, que a deliçio fue criada.
¿Que habedes vos, conde, por retraer la mi barba?
Ca de quando nasco a deliçio fue criada,
3285 Ca no me priso a ella fijo de mugier nada
Ni me la messo fijo de moro ni de cristiana,
Como yo a vos, conde, en el castiello de Cabra.
Quando prise a Cabra y a vos por la barba,
No hy hobo rapaz que no messo su pulgada;
3290 La que yo messe aun no es eguada.


102

102